Sígild uppskrift

Þú tekur einn pakka af venjulegu cheeriosi, opnar hann, gramsar vel og
vandlega oní honum til að vita hvort eitthvað stórhættulegt leikfang sé
ofaní (lífshættulegt ef gleypt er). Þegar það er búið nærðu í disk úr
diskaskápnum... ef hann er tómur eins og hjá mér þá gramsarðu ofarlega í
stóru uppvaskshrúguna í baðkarinu og finnur þar djúpan disk. Ath það er mjög
mikilvægt að diskurinn sé djúpur eins og skýrist seinna meir. Þú setur
diskinn á baðvigtina þína og hellir úr cheerios pakkanum nákvæmlega 100 g af
hringjum. Síðan ferðu í ísskápinn tekur út mjólkurfernu og þefar af henni.
Ferð inná bað og ælir og hellir síðan úr fernunni í vaskinn. Gramsar í
ísskápnum og af því að þú finnur enga fernu sem ekki er komin 2 mán fram
yfir tíma þá hleypurðu upp til Siggu á efri hæðinni og færð lánaðan hjá
henni mjólkurpott (lofar náttla að skila honum um leið og hinum 60 l sem þú
varst búinn að fá lánaða áður). Þegar þú kemur aftur niður til þín opnarðu
mjólkurfernuna og mælir út 1 dl af mjólk. Þurrkar vel og vandlega upp það
sem þú sullar útfyrir og hellir mjólkinni réttsælis yfir cheeriosið. Ath það
er mjög mikilvægt að hella þessu réttsælis svo að cheeriosið fari ekki öfugt
niður. Þarna kemur sko aðaltrykkið eins og ég benti á og er margoft búinn að
brenna mig á, ÞAÐ VERÐUR AÐ VERA DJÚPUR DISKUR annars flæðir mjólkin útaf
diskinum. Að þessu loknu dregurðu fram stofusófann og leitar vel og vandlega
í rykinu þar til þú finnur gamla skeið sem er búin að liggja þar síðan þú
eldaðir cheerios síðast ('62). Þurrkar þetta græna af skeiðinni og sest með
DJÚPA diskinn með réttinum í og borðar. Fyrir þá sem eru lengra komnir í
eldamennskunni og jafnvel húsmæðraskólagengnir hef ég heyrt að sniðugt sé að
sáldra 2 tsk af sykri yfir réttinn (réttsælis að sjálfsögðu) en ég hef því
miður ekki lagt í að prófa það ennþá.

Einnig má til hátíðarbrigða elda honní nött cheerios en þá notar maður pakka
af honní nött cheeriosi í staðinn. Það er heldur erfiðara þar sem honní
nöttið á það til að festast saman og getur gert erfiðara að hella úr
pakkanum nákvæmlega 100g.